Connect with us

BIDIYO

Allah Ya Hore Wa Arewa Hikimomi Ta Ko Wani Bangare, In Ji S. Boi

Published

on


Daya daga cikin shahararrun mawakan zamani na Hausa Hiphop, SUNUSI MUSA IDRIS, wanda a ka fi sani da S. BOI, ya samu tattaunawa da wakilin LEADERSHIP A YAU LAHADI, UMAR MUHSIN CIROMA, inda ya bayyana irin cigaban da wakokin nasu na Hiphop su ka samu a wannan zamani. Da fari S. Boi ya fara ne da rayuwarsa. Ga yadda tattaunawar ta kasance:
Za mu so mu ji kadan daga cikin tarihinka?
Ni dai an haife ni a garin Kaduna a unguwar Rigasa Abuja Road. Na taso a Rigasa Abuja Road, sannan na yi karatuna a Island Nursery and Primary School, bayan na kammala karatun firamri na je K/Mashi na yi sakandare dina junior da senior. A nan na gama School, amma duk da wannan abubuwan da na ke yi Ina harkar waka tuntini, saboda na taso a cikinta ne.

To, me ya sa ka zabi waka ta zama sana’arka?
Waka ni a gurina ba wani abu ba ne da don ka ji wani na yi ka ce kai ma bari ka je ka koya, ni kawai na taso na tsinci kaina a ciki ne, saboda ni tun asali mutum ne mai yawan sauraron wake-wake, wakokin da na ke yawan ji na Turawa a wancan lokacin na kan tsaya in yi ta bin bakinsu har in iya, to daga nan ne na fara gane cewa ni ma Ina da baiwar wakar, don a lokacin dik inda naga rubutu nakan karanta shi ne da waka kuma sai inga ya bada ma’ana. To, ta haka na fara yin wakata.

A wannan baiwar da Allah ya ba ka wadanne nasarori ka samu?
Gaskiya nasarorin su na da yawa, amma babbar nasarar da na samu iyayena sun ban goyon baya. mahaifiyata ta na ban goyon baya daidai gwargwado, don kuwa sanadiyyan addu’o’i da ta ke yi min da abokaina na samu nasarori sosai, na karbu a wajen al’umma, na kuma samu damar yin wakoki da manyan mawaka da a ke ji da su. Wadannan nasarori ne sosai, na je gurare da dama na alfarma, Ina samun yadda na ke so. amma ba abin mamaki ba ne, saboda burina ne wannan.

Duk inda a ka samu nasara a na samun kalubale. To, wani irin kalubale ka fuskanta?
To, kalubale dai ya na cikin duk wani abu da mutum ya ke burin yi a rayuwarsa, kawai lokutan dana fara waka nasan banda karfi dan hakan nakan yi sati kafin na hada kudin da zan shiga studio, kuma kan tashi ne tin daga unguwar mu inje Nasarawa Kaduna yin waka, amma duk matsalolin da za ka fuskanta ba za su hana ka zuwa inda ka ke son ka je ba. Don haka ni duk wata matsala da ta bijiro min Ina daukar ta a matsayin jarrabawa ce, kuma Ina kan cin jarrabawa. Don kuwa ni kullin ba na kallon baya, gaba na ke kallo kuma gaba na ke ci, don ni duk wanda ya ke min hassada, to ni ban ma san a na yi ba. Amma Ina ganin hakan ya na faruwa sosai. Don haka ni banda wata matsala a rayuwata.

Daga sanda ka fara waka kawo yanzu, ka na da wakoki kamar nawa?
Gaskiya wakokin da na yi ba su da yawa yadda ka ke tunani, don ni ban cika sakin wakoki koda yaushe ba. Na kan zauna ne na yi nazari, don na saki wakar da za ta girgiza duniya. Gabadaya dai ba su wuce 11 ba, wakokin dai dana yi a matsayin mawakin gaske.

Idan mutum ya fara tasowa a irin wannan yanayin na waka, wasu kungiyoyin su kan dauke shi. To, kai ka na da kungiya ne ko ka na zaman kanka ne?
Akwai kamfanonin da su ka raine ni a baya kamar SMB, wadanda su ke aiki a karkashin Smb Nation Rigasa. Ka ga wadannan sun raine ni sosai, su na daya daga cikin wadanda su ka hangi baiwar da Allah ya yi min. Don haka sun janyo ni a jiki na yi aiki da su sosai, kuma har yanzu ina aiki dasu ne. kullum har zuwa yanzu haka banda wani matsala da kowa.

Ka yi maganar ka yi wakoki da manya mawaka. Ko za ka iya lissafa ma na koda mutum uku ne da ka yi waka da su?
Na yi waka da Umar m Shareef; wani babban artist ne da ya ke zaune a Kaduna. Na yi waka da BOC, na kuma yi waka da Smartkid.skd da dai sauransu.

Ka kan yi waka da Turanci ne ko ka fi yi da Hausa?
Ni Ina yin wakata a duk yadda ta zo min, amma na fi yi da Hausa, saboda akwai wani abu da na ke so al’umma su gane, jin dadinmu ne a ce wakokin Hausa Hiphop duniya ta yi na’am da su. Duk inda ka je ka ji a na maganar shi. Don haka ni Ina yin waka da Hausa da Turanci, amma Hausa na ke so na daga.

A na cewa, mawakan Arewa ba su da hadin kai. To, amma kai ya ka kalli lamarin?
Gaskiya ne akwai wannan, amma babban abinda ke janyo haka saboda kowa ya na tunanin ya isa ne ko ya kai. Don haka ni a kullum Ina kallon kaina ni S. Boi ne ni ba kowa ba ne. Ka ga da haka sauran mawakan su ke daukar kansu da ba a samu wata matsala ba. Don haka S. Boi ba komai ba ne, ba kowa ba ne.

Akwai wata wakar da ka yi mai suna Arewa. Ta karbu sosai a duniya. Ko za ka iya gaya ma na darussan da ta ke koyarwa?
Wato wakar Arewanayi tane musamman don ‘yan Arewa, saboda duk wani yaro babba ko karami ya san me Kalmar Arewa yake nufi. Don haka na ke kara sanar da mutane da su Arewa muke da komai kuma ya bamu hikimomin ta kowani bangare, komai za suyi ayi tsakani da Allah. Don haka ka ga duk wani wanda ya ji wannan abin, ba zai so ya yi wasa da ita ba.

Ka san ko wane mawaki ya na da wanda su ka fi shakuwa da shi ko kusanci da shi. Ko za mu iya sanin kai da wa ka fi kusanci?
Gaskiya ni duk ‘artist’ mu na tare da su sosai. Ka ga kamar Santoss abokina ne sosai, haka kuma su Gwhy da Yarima, su Shama boi da dai sauransu duk dai wani ‘artist’ da ka san cewa ya na ‘rapping’ a Arewa mu na tare. Gaskiya ni ba ni da matsala da kowanne.

Wane irin buri ko tunani ka ke yi wa Arewa daga nan zuwa shekaru biyu masu zuwa?
Wane irin shekara biyu a na yi ma ka maganar watanni ne ai, saboda ai yanzu Arewa ta riga ta kama da wuta ko’ina maganarta a ke yi. Ka ga kamar yanzu Kaduna duk inda ka je za ka ga ba wani wanda zai tsaya ma ya na sauraron wakokin Turawa. Ko’ina yanzu wakokin Hausa Hiphop a ke yayi. Saboda haka kenan ka ga an riga an rufe aikin; kadan ne ya rage, kuma ka ga ko Turawan ma su na bibiyar abubuwan su kansu, don kuwa ka ga yanzu maganar da mu ke da kai, akwai wani mawakki na China ta hanyar wakokin da na ke yi na Hausa Hiphop, ya zo yanzu ya na so mu yi waka da shi. Don haka wakar Hausa ta riga ta bi duniya.

A baya ka ce ko lokacin da ka ke karatu ka na waka. Ta yaya ka ke iya hada karatu da waka?
Eh, ba abu ba ne mai sauki gaskiya, amma ka san ita waka a iya ‘earpiece’ ne kawai. Don haka daga na sa kida a ‘earpiece’, to shikenan an wuce gurin. Don Ina da wadanda ke buga min sauti, zan gaya mu su taken waka za su yi mun kida. Saboda haka duk lokacin da na samu lokaci kamar irin Asabar da Lahadi zan je na yi wakata. Saboda haka ni dai na san Ina yi, ba kowa ba ne ya san hakan.

Kawo yanzu ka na da Album din wakoki kamar nawa?
Ni daya-daya na ke yi ban taba yin ‘midtape’ ba, saboda Ina gani midtape a na yi ne idan ka na waka a gida, ba a san ka a ko’ina ba. Ni kuma ka ga an san ni a ko’ina daidai gwargwado, saboda ni tunda na taso komai nawa a tsare ya ke. Ina da masu shirya min kidana, Ina da ‘studio’ da na ke yin wakata. Hakan ne ya sa na samu karbuwa.

Kwanakin baya a na ta fadin ka na aiki da Kingz Of Arewa na su Lil Topeek. To, ya gaskiyar lamarin ya ke?
To, ba wai Ina aiki da su ba ne, mu na da kyakkyawar fahimta da su ne, su kan kira ni na yi mu su wani abu, ni ma idan bukatata ta taso Ina neman su, don ka ga ko wakar da ka ji na ce ma ka mun yi da Smartkid.skd da Santoss, sunan wakar Manyan Yara, ta na nan fitowa kwanan nan. Ka ga ni na shirya kayata na kira shi ya dora min murya. Ka ga ko kai za ka iya kira na mu yi waka tare.

Kawo yanzu ka na da bidiyo kamar nawa?
Na yi aiki a kan bidiyo da yawa, amma fa ban sake su ba. Akwai tsarin da na ke yi ne.

Ko za ka iya gaya ma na sunayen wakokinka da su ka yi suna kuma sun karbu a duniya?
Eh, ka ga kamar wakar Manyan Yara, ka ga an san ta a ko’ina, a na son Barka Da Sallah da Abokan Juna da Dukan Tsiya da kuma Ta Ci Leda, wata waka da nayi a kan Mata da kuma wakata Arewa. Yanzu ita a ke yayi, ita ke lokacinta.

Za mu so mu ji wasu daga cikin manya kyaututtukan da ka samu a harkar waka?
Gaskiya su na da yawa sosai. Ni ba zan iya tunawa ba, don ka ga akwai wanda makarantu su ka mun wasu a guraren ‘shows’, wasu wasan Sallah su ka yi min. Gaskiya su na da yawa sosai.

Za mu so mu ji sunayen wasu garuruwan da ka je ka yi wasa.
Gaskiya ka ga a kullun Ina bala’in mutunta ’yan Kaduna, don mutanen Kaduna sun goya mun baya dari bisa dari, don ka ga na je Edclusibe Garden wasa na tara mutane sama da 2,000 a cikin ‘hall’ daya, don da kyar na shiga da kyar a ka fitar da ni. Garuruwa da dama ma hakan ta faru. Ka ga na yi wasa a Abuja, na yi a Kano da dai sauransu.

Za mu so mu ji irin abincin da ka ke so da kuma kasar da ka ke son zuwa a duniya?
To, ni dai S. Boi Ina son cin shinkafa da wake, kuma Ina son zuwa Saudiyya, Itali da Amerika, Malaisiya da dai sauransu.

Wane jan hankali za ka yi wa ’yan uwanka mawakan?
To, mu daina daukar kanmu a matsayin wani abu, sai duniya ta dauke ka da mahimmanci. Saboda haka mu sauke girman kai, mu zauna lafiya da mutane, kada a rika tada fitani a tsakani, ka tsaya ka yi abinda ya dace ka yi a lokacin da ya kamata. Wacce irin shawara za ka ba wa sauran matasa masu ra’ayin yin waka? To, ni shawarata ita ce, su tsare mutuncinsu a duk halin da su ka tsinci kansu, kada ka yarda wani ya canza ma ka tunani ko ya sa ka rika waka ka na sa batsa a ciki. Wannan bai dace ba, mu kula mu kama kanmu gabadaya.

To, a karshe me za ka ce wa masoyanka?
To, ni S. Boi Ina son masoyana kwarai da gaske. Ina matukar kaunar su, kuma ba zan so na yi mu su abinda zai bata masu rai ba ko kadan ba. Ina nan Ina shirya mu ku wata zazzafa, ku tsammaci fituwarta kawai!


Advertisement
Click to comment

labarai